KW

للبدء في تربيه السمك

عبدالرحمن حسن علي
مؤســس المنتدى
مؤســس المنتدى
ذكر
الجنسية :
عدد المشاركات عدد المشاركات : 16042
تقييم المشترين تقييم المشترين : 49
واتساب واتساب : 201289700022
معاينة صفحة البيانات الشخصي للعضو

في الجمعة 3 ديسمبر - 20:16

السلام عليكم ورحمه الله وبركاته

كل عام وأنتم بأتم صحه وعافيه إخواني واخواتي الكرام

بصراحه عمري ما ربيت سمك ولكني بستعد للبدء في إنشاء حوضي الخاص

ليست عندي أيه تجارب في تربيه الأسماك ولكن طوال حياتي كنت شغوفا بهذه الهوايه الرائعه وشجعني أكثر أعضاء المنتدى الرائع ومشرفيه الأفاضل الذين يقدمون بالفعل بيئه خصبه للأعضاء للتعلم والإرتقاء بمهاراتهم في هوايتهم

==================

انا قرأت كتير وتقريبا كونت صوره للحوض إلي نفسي فيه وعرف تقريبا حجات كتير بس الصوره في راسي مشوشه لأني في حجات ملخبطاني شويه وأتمنى منكم إنكم تساعدوني شويه


مبدئيا أنا عندي حوضين هيكون بالمقاسات دي

الأول
طول القاعده 55 سم
عرض القاعده 40 سم
الإرتفاع 75 سم

أنا مقيد بالمقاسات دي لأن دي جزء في الحائط في شقتي وناوي أصمم الحوض علشان يوضع داخل الجزء ده

الثاني

طول القاعده 100 سم
عرض القاعده 50 سم
الإرتفاع 60 سم

عايز أعرف سمك الزجاج الذي يجب أن أستعمله ؟؟؟ 6 ولا 8 ولا 10 مم وكمان عايز أعرف نوعه فيومي ولا إسكندراني ولا بلجيكي ولا فرنسي

دا مبدإيا
================================================== =============
بعد كدا بقى ندخل بقى على الحته إلي ملخبطاني على الآخر

إيه الحاجات إلي لازم أحطها في الحوض وإيه وظيفتها وإيه أفضل الماركات ومنين أجيبها ولو في فكره عن أسعارها

يعني أنا متلخبط

أنا إلي فهمته إني محتاج مضخه هواء مش عارف وظيفتها إيه ((موتور تقريبا في السوق إسمه كدا)) وياريت أعرف أفضل نوع وقوته المناسبه للحوض
========================
كمان محتاج فلتر بس هنا بقى مش عارف أفرق بين كل نوع ووظيفته ياترى أجيب فلتر داخلي ؟؟؟ ولا فلتر خارجي ؟؟؟ ولا فلتر بيولوجي ؟؟؟ ولا فلتر إسفنجي ؟؟؟ ولا يا ترى فيه أنواع تاني ؟؟؟

وبتمنى أعرف وظيفه كل نوع وإيه الفروقات بين كل نوع والتاني وأفضل الأنواع والقوه المطلوبه للفلتر المناسب للحوض بتاعي

========================================
كمان أنا فهمت إني محتاج سخان لضبط درجه حراره الماء خصوصا إن المكان عندي بارد شتاء مكيف الهواء صيفا فا عايز أعرف القوه المطلوه للحوض عندي وأفضل نوع وعرفت كمان إن في نوع ترموستات وفي نوع دائم التسخين بس معرفش أنهي فيهم افضل

كمان عرفت إن لازم أحط دوا لمعالجه الكلور ؟؟؟ طيب إسم الدواء إيه وأجيبه منين وطريقه إستعماله الصحيحه ((الكميه / التر) .
=====================================
وعرفت إني لازم اترك الماء يكمل دورته البيولوجيه قبل وضع السمك لمده أسبوع تقريبا طيب لازم أضيف أي حاجه غير الدواء بتاع الكلور ؟؟؟ لازم أضيف نوع معين من السمك ؟؟؟ ولا أسيبه فاضي خالص بس الميه والأجهزه ؟؟؟
==========================
وكمان بقى مش عارف يعني إيه إسكيمر ؟؟ ومش عارف يعني إيه شيلير ومحتاجهم ولا لآ ؟؟؟؟ ولو محتاجهم وظيفتهم إيه وافضل نوع وأجيبه منين وبكام
=================
وهل من السهل زراعه الحوض بالزرع الطبيعهي ولا أكتفي بالزرع الصناعي ؟؟؟ ولو حبيت أزرع زرع طبيعي أجيب البذور بتاعت النباتات امائيه منين ؟؟؟ وهل دا افضل للسمك ؟؟؟ ولا الصناعي افضل ؟؟؟ وهل دا افضل للبيئه في الحوض ولا الصناعي افضل ؟؟؟وعايز أعرف هل أنا محتاج جهاز ثاني أكسيد الكربون ولا لأ ؟؟؟؟ وهل جهاز ثاني أكسيد الكربون بيضر ببيئه السمك لحساب الزراعه ؟؟؟
===========================
كمان عايز أعرف إيه الجهاز أو الطريقه إلي اسيطر بيها على مستوى PH في الحوض وأجيبه منين وبكام وافضل نوع في السوق
=============================
وكمان عايز أعرف لو في جهاز لحساب مستوى الأمونيا ولا بس أسيطر عليها بالطرق المذكوره من تغيير الماء والسيطره على كميه الطعام إلخ...........
==============================
كمان عايز أعرف أفضل نوع جرش ولا أحط حاجه غير الجرش ((زلط مثلا)) ولا أحط جرش ملون ولا أحط رمل ولا إيه مساوئ ومحاسن ك نوع وإيه الأسهل ليا كهاوي
==========================================
وطبعا أخيرا وليس آخرا أنا عايز أعرف إيه الأنواع السهله إلي ابتدي بيها تربيتي مع العلم إني مصمم على تربيه أنواع يمكن تكاثرها في البيت لأن أنا متعتي هتكون في تفريخ أي نوع من أنواع السمك حتى لو نوع سهل وممكن أي حد يفرخه ، لأن الفرجه لوحدها مش كفايه التحدي والإنجاز هي دي المتعه الحقيقيه.
===============================================
أنا بجد عارف إن الموضوع مليان اسئله ووجع دماغ وعارف إن كل نقطه من دول عايزه موضوع لوحدها علشان تاخد حقها

بس بجد لو فتحنا هنا حلقه نقاش جمعنا فيها المعلومات العلميه + التجارب العمليه + خبرات الأعضاء هنطلع بافضل موضوع شامل كامل يتيح لكل عضو مبتدئ صوره كامله واضحه المعالم والخطوات لتكوين حوض مياه رائع ومتكامل




█║▌│█│║▌║││█║▌│║█║▌
النّاجحون يبحثون دائماً عن الفرص لمساعدة الآخرين بينما الفاشلون يسألون دائماً ماذا سوف نستفيد نحن من ذلك
إرسال مساهمة في موضوع
اعلانات مشابهة