KW

مشاعل,,,الحــب الحقيقي!! للرجال فقط

matrix@man
معلن جديد
معلن جديد
ذكر
الجنسية :
عدد المشاركات عدد المشاركات : 303
تقييم المشترين تقييم المشترين : 0
العمر العمر : 23
معاينة صفحة البيانات الشخصي للعضو

في الخميس 15 يوليو - 4:03

بسم الله الرحمن الرحيم
الددسن قيرها عطلان !!..يعشق الأول والثالث والخامس
يعني مايعشق إلا الأرقام الفردية..وأغسل يدك انة يعشق رقم زوجي.
التعليمات:عدم تجاوز السرعة المحددة نهائياً وهي 30 كيلو متر بالساعة لكل رحلة .
المسافة:من بيتنا لييييين بيت الحارثي كأبعد حد
(الحارثي جارنا اللي باخر الحارة..ولاتنشدني لية مادانية,,ياما كفخني ولدة بس ماني معلممشاعل,,,الحــب الحقيقي!! للرجال)
المهمة الرئيسية :إحضار زبادي قليل الدسم وخبز بر لجدي من البقالة اللي بين حارتناوبين حارة الحارثي,,
كل يوم بعد صلاة المغرب مباشرة,
وإي إستغلال لهذة الثقة المنوطة بي
(قد يكون أستغلال الثقة مثلاًً وليس حصراً المرور من أمام بيت أبو حمود بحيث يراني ولدة عبداللهمشاعل,,,الحــب الحقيقي!! للرجال لأن ذلك يعتبر من الدشرة التي يحاسب عليها القانون ومالة داعي تمر من هناك,الطريق من عند بيت الحارثي ماهو من عند بيت ابو حمود) ,يعتبر جريمة نكراء ,يعاقب عليها القانون والمجتمع وجدي راعي الزبادي وعماني اللي جالسين بالمقلط ,
بما فيهم أبوي ليا رجع من الدوام.
المعوقات:
ينتابني الحزن,وقد لا استطيع أن أوصف ما أمر بة من معوقات,,أنها أكثر من أن أقول,
ولكن حيل الله أقوى
أول المعوقات هي كالتالي:
من المعروف جدا ومن البديهي ومن المسلمات الفيزيائية أن أي واحد معة مايباخ
وماتعشق إلا الفردي
يجب أن يتجاوز السرعة المحددة لة من قبل جدة والحكومة اللي بالمقلط..
لذلك كانت أكبر المعوقات هي السرعة الأجبارية والتي بحسن نية..لأن الددسن أيها الأخوة الأعزاء إذا خليتها بواحد تحن..وإذا عطيتها الثالث طارت.
كنت قد قلت لكم منذ زمن بعيد..بأن وقت تنفيذ المهمة كان بعد صلاة المغرب مباشرة,
وكان المسجد يقع بين حارتنا وحارت الحارثي الله يذكرة بالخير(الشايب).
وكان شيبان الحارة كلهم يتبطحون أمام المسجد,ويتناقشون بما حدث لهم خلال اليوم,أبو سلطان مثلا:يتحدث عن الطاسة حقت السبرمان حقة,ويخبر الحضور بأنها دائما ماتسقط والسيارة تسير , وأبو حمود كان كثيراً مايشتكي من المطوع ويقول أنة يتأخر ومايقيم الصلاة إلا لين يطفش (أبو حمود).
ويتفق الجميع من هؤلاء المسنين بأن عيال اليوم مافيهم خير,وأن الخير كان بالناس الأولين,وذلك شيئا لابد أن يقال في كل مجلساً يجتمع بة المسنون(مالومهم يبغون يطلعون أي ايجابيات في حياتهم الأولية).
وكان لابد ومن الأساسيات التي يجتمعون عليها هي أن كل واحد يشتكي من السكر والضغط وألم المفاصل.
وبينما هم يتناقشون,,,
وبدون سابق أنذار.
يمر من أمامهم خالد, طاير(والعياذ بالله)والددسن بالثالث,(ياناس والله العظيم غصبن عني وش تبوني اسوي)
والذي زاد الطين بلة,أن المدعو خالد كان طاااير,وكان القزاز مسكر,مما يعني أن المكيف شغال,وهذي جريمة نكراء..قد تصل لحد الشنق حتى الموت,,أو الرمي بالرصاص,أو النفي من الأرض..أو كلاهما معاً,لأن السرعة الزائدة والجنونية وتشغيل المكيف ,تعتبر من إهلاك الممتلكات والدداسن بشئ من التفصيل(بالله لية حاطين مكيف,عشان نتفرج فية!)
توارى خالد عن الأنظار,والددسن كذلك,وبدأ هؤلاء المسنين يحشون في هذا الجيل,ويذكرون مساوئة...وكل ذلك لم يأتي عبثاً وإنما من الواقع الذي أمامهم,,(ماشفتو خالد هالداشر وش سوا!!)
أتفق أبائي وأعزائي المسنين على أن أحسن حل ,هو إخبار جدي بذلك,,لأنه قد يتمادى خالد ويضع القير بالخامس عندما يتعدى بيت الحارثي,,بحيث أنة لايوجد لارقيب ولا حسيب بعد ذلك البيت لأنه بأخر الحارة من شرق,ونحن (المسنين)نعين ونعاون ولازم نعلم جدة عشان يتأدب ذا الداشر,ما امداهم يخلصون نقاشهم ونواياهم,,وبدون سابق إنذار,,وحتى لم يدق بوري ويسلم
مر خالداً وهو طاير(ويعتقد شهود عيان أن الحرارة كانت فوق النص),,للمرة الثانية ,حصل نفس السيناريو ولكن
أستطاع أحد الشيبان أن يراني عن قرب وأنا في طريق العودة,,وأستطاع أن يعرف أنني لابس كبوس(كاب),,,مما جعل المصيبة تكون أكبر ,,ولاحول ولاقوة إلا بالله
هذا الكاب أضعة تحت السيت,بحيث لايراة احد من أعمامي أو جدي
وكنت أخرج لتنفيذ المهمة وانا لابس شماغ ملكي وطاقية ملكية(مما زاد حسادي من الشباب وكبار السن) وعندما أبتعد قليلا عن البيت,,احذف الشماغ وألبس الكاب,,وبذلك أصبح أكبر داشر في حارتنا,,(لابس كاب ومشغل المكيف والددسن بالثالث)
وصلت إلى البيت,,وكانت أمي في الحوش حق الحريم,,فسلمت عليها جيداً(خابر أني مسوي بلا)
وصلتُ إلى المقلط ووجدت جدي جالس يتسمع بالرادو,,وكانت فية أغنية للأم كلثوم,,وكانت تقول..أغداً ألقاك!ياخوف فؤادي من غد(ي)...يالشوقي وأحتراقي في أنتظار الموعد(ي),,
عطيتة الزبادي والخبز, وأنا طالع ,تشربكت في الواير حق الرادو,,(عمي ما اشترى له بطاريات مع ان جدي موصية يوم الجمعة) وحصلت لي كم دعوة على كيف كيفك,,مع التهديد بالعصا إن لزم الأمر,,فهربت مسرعاً للمجبب(هو مكان يتجمع فية الربع بعد صلاة العصر ومليء بالبريعصيات,,وكنت أحب أن أجمع حسنات وأقضي على كل بريعصي يوطوط حول المجبب )
فغصت لي كم بريعصي لين أذن العشاوطلع جدي للمسجد,,ورحت بعدة..مما يدل على أنني شخص داشر بكل ماتعنية الكلمة وتوضيت هناك(بالمسجد)
أول مادخلت المسجد لقيت أبو حمود قدامي,,فقلت له:مساك الله بالخير ياعم..وأخذت الكرسي عنة عشان احطة لة بالصف الأول وما اخفي عليكم ماهو حب(ن) فية , لكن من مبدأ أتقي شر من أسأت إلية.
كالعادة,,تأخر المطوع,,وأخيراً جا
وصـلينا,,
طبعاً..أول ماسلم المطوع..كنت انا اول واحد طلع من المسجد,,
عشان أسأل حمود هو شافني يوم مريت من عند بيتهم والا لا
وبالتأكيد,,كان جوابة,,(اية شفتك وانت طاير ولابس الكبوس يالزاحف)
في تلك اللحظة,,كنت أشعر بنشوة الأنتصار,,وكانت تغمرني الفرحة,,فأنتم لاتعرفون القصـص والحكايات اللي راح يقولها عني حمود بكرة بالصف
جدي والشيبان ربعة يستغفرون ويسبحون ويهللون ويتسننون,,همن يطلعون من المسجد ويدردشون شويات
أول ماطلع جدي,,إلا أبو حمود لة,,والمسنين شهود العيان الثانين,,علمو جدي بالقصة كلها..وهي كالتالي:خالد ولدكم طاير على ذا الددسن الجديدة والمكيف شغال,,ولابسن طاقية مسيحي,,وترا حرارة السيارة كانت واصلة للأتش,,
خلصت سوالفي مع حمود قبل مايطلعون الشيبان أصلاً
ورحت للبيت
وجلست بالمقلط عشان عمي قالي انطق هنا(أنثبر هنا) عشان أليا بغينا العشا تروح تجيبة,,ماهو ندورك ومانلقاك,,
ما امداني ارتاح شوي,,إلا جدي الغالي جاي,,وكان وجهه أحمرا من شدة الغضب,,وعيونة صفر,,ومفحج(تعتبر هذة الوضعية في الوقوف هي من أشد مراحل الغضب,,بحيث أن هذا الشخص المفحج أمامك سوف لن تستطيع أن تنحاش منة إلى أمك,,أو حتى إلى الحمام لكي تقفل على نفسك,,فهو مفحج,,وسيسيطر عليك بكل سهولة)
بكل رضا بقضاء الله وقدرة,,سلمت نفسي وبدون مقاومة
وأعترفت بأنني كنت مسرعا جدأ,,وكنت لابس كبوس,,وكنت مشغل المكيف,,فضربني ضرباً شديدا لم أرا مثلة قط,,(ضرب سنة بساعة)
وذهبت لكي أنام,,فوجدت أختي قدامي
فكفختهاشر تكفيخ(من قالهاتقرفط ثوبي اللي انا معلق بالدريشة)


أستمرت حياتي على هذا المنوال
وكلما أكبر,,تكبر المهمات
تخرجت من المرحلة الثانوية وكنت الأول على الفصل
(أصلا الباقين كلهم رسبو بما فيهم حمود)
طلبت من أبي كثير الغياب,,أن يسمح لي بالبعثة,,ألى مدينة الدمام,,اللتي تبعد عننا الكثير من الساعات على ظهر الددسن
وبعد ان أستشار جدي,,وافق أخيرا
حجزت رحلة للدمام بالنقل الجماعي
وشهادتي معي,,ومعي مبلغا كبيرا من المال,,ثروة
لاتفكرو أن عندي هواية,,أو انني أبغى أصير مهندس..أو دكتور أو ضابط..أو جندي منتف,,كنت ادور اقرب شي...يعني اللي يجي يجي..مافي مشكلة
وصلت الدمام..بالسلامة
حمود كان لة ولد خالة..أسمة سعود,,عطاني رقم تلفون بيتهم,,وقال اليا وصلت هناك دق على تلفونهم من اقرب كبينه..وتراة طيب وموظف..ويعرف كل شي بالدمام
دقيت على سعود وجا,,ورحت معة للكلية الصحية اللي بحي عبدالله فؤاد,,وقدمت عليها,,وقبلوني على طول,,
وقالو بعد أسبوع يبدا الترم الأول,,قلت يعني قصدك الفصل الأول؟..قال اية الفصل الأول
الكلية فيها سكن طلاب مجاني,,وماقصرو عطوني غرفة جزاهم الله خير
سكنت بالغرفة,,وشريت لي بنطلون لونة رمادي(أبوي وجدي لو شافوني كان طردوني من البيت,,وتبرأو مني بعد),,عاد والله اني تمنيت ان حمود يشوفني,,كان تبي تقطع تسبدة من القهــر
وعطوني جاكيت زي حق الدكاترة,,وما أخفيكم سرا..كنت احيانا انام فية,,,يذبحني البرد من مكيفاتهم المركزية ونسيت الفروة حقتي بحجرت أمي(الغرفة الرئيسية)
كان خويي بالغرفة واحد حساوي
قلبة طيب,,وراعي طرب
عندة عود,,وطبلة كبيرة,,
وعندة مسجل كبير,,أول مرة بحياتي أشوفة
وعندة شرطان لأم كلثوم..وعبدالحليم..وحجاب وخلف ,,وفهد بن سعيد..وفريد الأطرش..ومنى أمارشا(نصاب)
الشرطان ذولي مسوي لهم ترتيب..حاطهم في شنطة زي حقت المتزوجين اللي يجي عليها حديد ولونها أخضر
يمكن عدد الشرطان اللي عندة حوالي اربع مية وثلاثين شريط
انا ماعمري سمعت لا اغاني ولا طرب ولاذي ولا ذاك
ماكملت معة أسبوع..ألا وانا أموت بشي أسمة طرب
وتعلمت الدق على العود..وعرفت اسماء الاوتار
بس الطبل ماعرفت له..يمكن عندي خلل بالجينات,,أو يمكن عشان أنا أنحدر من عايلة لونها أبيض.
صارت حياتي كلها بس دراسة وطرب
وحسيت اني انسان,,يعني مافي ابو حمود اخاف منة
ولافية جدي ينشب لي,,ولاحتى مجلس الأمن اللي بالمقلط,,ولا المجتمع الدولي اللي عند المسجد,,ويراقبون متى خالد يجيب الزبادي ويوصل(تصدقون انهم يعرفون اني ماروح الا اجيب زبادي وخبز!!)

المهم والزبدة,,خالد صار رجال
يعني حسيت اني لي كيان خاص
بدون تدخلات خارجية
خويي الحساوي الله يذكرة بالخير,كان يكتب كلمات ويغنيها
وصراحة شفتة سوا حركات ماعمري شفتها بعمري
تدرون وشو!
كان أغلب الكلمات اللي هو يكتب ويغني,,يقول فيها..أحبك ومدري وشو..عاد هذي اكبر جريمة,,والله تهون السرعة وتشغيل المكيف..وحتى يهون لو انك رايح حارة ابو حمود بعد,,
وبعد اشوفة يكتب كلمات ,,لعيونك اموت واحيا
وبقربك أخضرت صحاري,,ومن ذا العلوم
وماطاح من عيني الا يوم كتب مرة:

ميشو أحبك زود لو زعل دادي
أبغى أضمك,,لين يوم المعادي
أنتي غلاي..وروح قلبي وزادي
دامك معي,,بطنش الناس عادي
خلي الخجل,,وأرحبي في فؤادي
عيشي دفاهـ,,وعيشيني مرادي

في تلك اللحظة..أحسست بأن هناك شيء يقال لة الحب
طبعاً ماعمري سمعت بهالشي من خلقني ربي
ذاك اليوم مانمت ,,لما سمعت هالكلمات
كلة افكر,,اقول بخاطري منهي ميشو..وكيف سالفة الحب أصلا
وافكر شلون يضمها؟,,يعني مثلا يضمها وهي لابسة عباية,,طيب اوكي متأكد انها لابسة عباية..بس هي كاشفة والا لا؟..من كثر الدلاخة,,ماخطر في بالي انها بتكون حبيبتة معه بدون عباية
اخذت يومين وانا ماكلمة,,خفت اني اصير سربوت
وبعدين سألتة:منهي البنت اللي انت تحب!
ضحك ليين داخ..وعلمني
هذي ياخالد بنت عرفتها من أيام الثانوي,,كنت طالع من المدرسة للبيت,,وشفتها,,وحسيت ان فيه شي جذبني لها ياخالد,,وفعلاً..صار الحب,,(مبقق عيوني انا الحين)
قلت يعني يوم هي اعجبتك,,وش سويت؟..قال استمرينا كلها نظرات,,تقريبا حوالي شهر على هالحال,,وبعدين كلمتها وسألتها عن اسمها,,وقلت لها : انا ما انام الليل وربي كلة افكر فيك
وهي ماصدقت..قالت وانا والله نفس الشي ياحبيبي,,قلت طيب وش طلع اسمها؟..قال: مشاعل!..أنا رحت فيها,,أول مرة اسمع بأسم زي كذا,,,أعرف منيرة,,هيفا..جوزا,,فنيسة..موزة..بس مشاعل...صراحة قمة التطور!
قلت طيب,,يعني تخيل,,بس خيال يعني,,ترا مو اكيد ولا شي
بس يعني مثلا لو انا فكرت اني أحب وحدهـ أسمها مشاعل..وأصير أدانيها وتدانيني(الحب بالعربي)مثلك بالزبط, شلون اسوي!
قال اسمع:أولاً لاتقول ادانيها وتدانيني...قول احبها وتحبني..انت وين عايش ياغبي!
قلت لو سمحت لاتغلط..قمط العافية وتعذر مني
وقبلت عذرة...احسن من انة يكفخني
قال شوف..اذا كنت أنسان حبيب(بتشديد الياء الوسطية..وهو فيه غيرها!!كم مرة اقول ركزو!!)
قال إذا كنت أنسان حبيب ورومنسي ..فأنا بقول لك نصحية..لوجة الله..قلت تفضل..قال:لاتبحث عن الحب..ولكن دع الحب يجدك..
قلت أية هين..وين بيلقاني الحب وانا في ذا الغرفة ولابس الجاكيت!
وقال خويي الحساوي الله يطول في عمرة..قال الحب شي خطير..يخليك تحس انك رجال..تصدق ياخالد اني مدري انت كيف عايش بدون حب!!..يعني بالله بجد ..مافي بنت تحبها؟..مثلا يعني مافي بنت معجبة فيك؟..(اول واحد خطر على بالي ..الأخ العزيز...حمود..مشاعل,,,الحــب الحقيقي!! للرجال)
قلت والله ماعرف إلا حمود..وتراة والله شروا من عندي..
يعني لو انحديت ومالقيت حبيبة..اقدر احبة؟
طالع فيني خويي...بأستحقار..وقال:يلعن شكلك يالمجرم..أثرك شاذ!!
سويت نفسي ذكي(مافهمت وش معنى كلامة اصلا! يعني أعرف الددسن..المكيف..المقلط والمجبب..بس كلمة شاذ..غريبة بالنسبة لي)
قلت الله يرج أبليسك...بالله من اللي علمك!!
(في تلك اللحظة..ماخطر في بالي أن كلمة شاذ معناها قبيح..كل اللي كنت افكر فية..أنها كلمة عن الحب..والبحث عن فتاة أسمها مشاعل)
ذاك اليوم خويي ماتعشى معي..وحسيت أني حمار كبير
بعدين جاني ...وقال لي ياخالد ترا اللي جالس تسوية حرام عليك....ويمكن ربي يخسف بك الأرض..وترا انا والله ماعندي أستعداد اني اصاحبك بالمرة..وبس يجي يوم السبت بكلم المدير وبخلية يدور لي روم ميت غيرك..لأني اخاف من صحبتك وأخاف من عقاب ربي...(ياليل ما اطولك,,,خوينا علامة!)
أستطعت بكل حنكة ودهاء..أني أسألة ليش تقول كل هالكلام..
أخيراً...وبعد ساعات طويلة من النقاش المزري..أكتشف صديقي أطال الله في عمرة..أن الأخ خالد..دلخ كبير..ولم يكن على دراية بمعنى تلك الكلمة..(نصيحة يالربع...اذا ماتعرف شي..مو عيب أنك تقول ماعرف,,والا ترا خويك اللي معك بالغرفة..بيدور غيرك..وأنت تصير لحالك)
ذاك اليوم صديقي مانام من الضحك..لقد ضحك حتى أصفرت ثناياة
وانا كنت جالس برا..مسوي فيها زعلان(محد قالك تتفلسف على خويك وتسوي فيها فاهم)
وفي منتصف الأسبوع
يوم الأثنين
جاني خويي وقال:خلود (بتشديد اللام) يوم الأربعاء ميشو بتجي عندنا...أبوها وأمها بيروحون بيت جدها..وهي قالت عندها أختبار..عشان تسير علي (كذبة بيضا)
وأبيك تتعرف عليها
وانا كلمتها كثير عنك
وهي متحمسة أنها تشوفك وتسولف معي انا وياك
(حسيت بحرارة,,في جبهتي..وخشمي..وحسيت يديني ترجف..وراحت علومي..)
فكرت أني افصل من الكلية وأرجع للديرة
بس قلت لو رجعت...حمود بيسوي لي قصة..كم يبغالي على بال ما افهمة وش فية بالدمام!!...وعشان ان حمود مايفهم..تراجعت عن فكرة أني افصل لأني بجد راح اتعب وانا اقولة وماراح يفهم بالأخير..
فكرة بشي ثاني..قلت الحين حنا يوم الأثنين..ورا ما اروح للشرطة يوم الأربعاء بعد صلاة الظهر(ميشو بتجي العصر)..واقول لهم انا ذبحت لي واحد
واخليهم يحطوني بالسجن..لين يوم الخميس..همن بعدين اقول لهم تراني كنت امزح معكم..والله لاذبحت احد ولا شي!
وخفت انهم يصدقوني ويحكمون علي قصاص
حاولت اني احصل اي خطة..لكن كلها باءت بالفشل
وصلنا ليوم الربوع
قلت في نفسي..انت خالد..وياما مريت من عند بيت ابو حمود..وشافك حمود وانت طاير..وياما لبست كبوس..والمكيف شغال..وياما ذبحت بريعصي في المجبب..وبديت اذكر نفسي في أمجادي وإنتصاراتي..كل هالكلام..عشان تصير معنوياتي عالية..واقدر اقابل ميشو
جا يوم الأربعاء
وقلت لازم اكشخ..عشان مافشل خويي
اخذت ثيابي كلها والشماغ الملكي والطاقية..وحطيتهم في الغرفة اللي بجنبنا..عشان ميشو ماتشوفهم..وتدري اني بدوي..ولبست البنطلون حقي اللي لونة رمادي(تصدقون..كأنة بنطلون مقاول صعيدي..بس كنت كشخة ذاك الوقت)
صراحة بغيت اتروش ..بس تذكرت اني توني متروش..يعني ماغلقت اربع ايام..متروش يوم الأحد..وشولة اتروش هالحين!!أخليها يوم الجمعة أحسن
لبست الجاكيت حق الكلية..ولقيت عند خويي دهون حق شعر..وحطيت على شعري منة..
سويت لنا قهوة..وشاهي..وحطيت القدوع
وجلست انتضر ميشو انا وخويي
وماتأخرت بنت الحلال..ابد بعد الصلاة مباشرة إلا وهي جاية
خويي اللي فتح الباب
وأول ماشافته...وهي تحط يدينها من ورا رقبته..وهالحمار يجلس يسوي حركات غير لائقة(قبلات على الخد..وضمة على الجذع النحيل)
انا واقف..ومدري شلون بسوي لو جت عندي..ولما خلص خويي من ميشو..مسك يدها..وجابها لحد عندي..وقال هذا خالد اللي تسألين عنة..الكلبة ماسلمت علي(مع اني كاشخ ولابس الجاكيت)
قلت زين..مالة داعي تحرجني...جلست قدام في صدر الغرفة..وخويي بجنبها..وانا جالس مقابلهم على ركبة..واصب لهم قهوة(متعود اقهوي أبو حمود..والشيبان الثانين..ومانسيت وصيةأبوي لي..يوم يقول عيب تقهوي الرياجيل وانت متربع..خلك واقف..وأن حدت الأمور تجلس على ركبة بس...)
قهويتهم لين طفشت..ميشو تشرب القهوة شرب الهيم
وخويي يموت بالشاهي
تصدقون..أنها ماكلمتني!!
كلة جالسة تسولف مع خويي...وانا صافطتني
قلت في قلبي هين..والله أن قالها الله ...لأحصل لي ميشو ...وأخليك تموت قهر يالقوطي(خويي يلقب بالقوطي)
وانتي ياميشو سنعك عندي..ماعاد انا مسوي لك قهوة مره ثانية
أذن المغرب..وقالت ميشو انها بتروح للبيت..عشان وقت صلاة المغرب ضيق..وخافت أنة تفوتها الصلاة..وكان القوطي موافق تماماً للفكرة.
صلينا المغرب والعشا انا والقوطي...ولما بغيت انام
قلت : والله يالقوطي ميشو طاحت من عيني..
قال:أفا...لية ياخلود!
قلت ياخوي ماسولفت معي ولا شي..والله كأن قدامها أفريقي
لعنبو ابليسها عالاقل تقول لي احبك..تقول لي اي شي
قال القوطي متعجا: تبيها تقول أحبك!!
وكان متسلقيا...فجلس..تبيها تقول احبك!!!
أجل انا وش اسوي في حياتي!!
انت وين عايش!!
وانهال علي باألفاض تعودت عليها كثيرا..ولكنها مؤلمة
قال :انت تحسب العلاقة بين البنت والولد كلها حب!!
ترا فية علاقة صداقة..وفية علاقة حب
واللي بينك وبين ميشو..علاقة صداقة وبس...ولاتفكر أكثر من كذا
(حسيت اني عايش بعالم ثاني!!..وش الفرق بين الصداقة والحب!!..يعني لما تكون صديقي..اكيد اني احبك..ولما احبك..اكيد انك صديقي!!..وكان مقياسي لهذة العلاقة..هو حمود..ولد ابو حمود)
بعد شرح مطول ..من صديقي العزيز..عرفت وش السالفة
وصراحة ماقصر..وعلمني أنة معطي ميشو تعليمات أنها ماتتكلم معاي..لأنة يغار عليها..وطبعاً..تعريف الغيرة بين الحبايب..أخذ منة وقت كثير..عشان اعرف فعلاً معنى هذة الكلمة
وما انسى معروفة..فجزاة الله خير الجزاء




بعد مدة ليست بالقصيرة..وبعد محاولات من القائد الروحي لمركب الحب..والمرشد الأعلى لي..لقيت لي حبيبة
بس للأسف...لم يكن أسمها مشاعل..وقد أخبرني صديقي..وقال:مو لازم انك تحب وحدة اسمها مشاعل..يعني عادي تحب وحدة اسمها سارة..نونة,,او حتى جودة
الحب ياخالد مايرتكز على المسمى للطرفين..ولكن على اللي في قلوب الطرفين من حب صادق
هذي الحبيبة اللي اغليها اكثر من حمود..أسمها نورة...وعلمني خويي ان اسم الدلع حقها...نونة
وماخليت باب في دورات المياة الله يكرمكم..إلا كتبت أسمها علية
وقد زاد جنوني..مما حداني ان اكتب أسمها على مخباة ثوبي الأمامية..وهو حرف الإنn
وهذي الفكرة حقت الحرف..لم تكن أختراعي..وإنما شفت خويي كاتب حرف الـm,,,وإقتداءا بة..فصلت ثوب من عند عميلة الخياط..وخليتة يحط لي نفس الحركة
للحديث بقية,,,على حسب الردود والأراء ,,فهذة مجساتي المبدأيةمشاعل,,,الحــب الحقيقي!! للرجال
تنبية:الأبعاد قد لاتبدو حقيقية!
عبدالرحمن حسن علي
مؤســس المنتدى
مؤســس المنتدى
ذكر
الجنسية :
عدد المشاركات عدد المشاركات : 16042
تقييم المشترين تقييم المشترين : 49
واتساب واتساب : 201289700022
معاينة صفحة البيانات الشخصي للعضو

في السبت 17 يوليو - 4:25





█║▌│█│║▌║││█║▌│║█║▌
النّاجحون يبحثون دائماً عن الفرص لمساعدة الآخرين بينما الفاشلون يسألون دائماً ماذا سوف نستفيد نحن من ذلك
إرسال مساهمة في موضوع
اعلانات مشابهة